ინებე შემობრძანება
შენეულ კარმიდამოში,
ყინვა იფრინე თავნება,
ჩაგვაცვი
ქარვის სამოსი.
ვაზი აავსე გალობით,
გაალღვე მიქა ხეშეში,
მზეო, ამოდი,
ამოდი,
ძილის გუდობას შეეშვი,
ყავარჯნად შემოეშველე
ჩვენს ხელებს
შრომით დაძარღვულს,
ყოველ ზაფხულს
და გაზაფხულს
შენს შესახვედრად
დავძრავთ გულს .
აავსებ მზით და წყალობით
მთებს_ქვევრებს
ასკოკიანებს,
მზევ, ჩემს ცაზედაც ამოდი,
დავფესვდე,
დავტოტიანდე.
ამავსე ლექსით,
გალობით,
შენი მრავალგზის
მევალე,
მზეო, ამოდი, ამოდი,
ნუ ეფარები მწვერვალებს.